هدرزة الليلة
مجموعة صور لحوش القذافي
(القيادة - باب العزيزية)
التقطهم بواسطة جوجل ارث
لرؤية الصور بوضوح الرجاء الضغط عليها مشكورين
حوش معمر القذافي اللي كاتبين عليه هما (باب اكارة)
ما تعدلوش عليهم يكذبوا هذا حوش القذافي
الصورة كما أمامكم
اللي لون أرضها خضراء وعامرة هذه منطقة حوش القذافي
ويحدها سياج من (الاسمنت المسلح)
هذا من غير الحرس والمذرعات
اللي حولها باللود اللايد
وأنت خاطم جنبها ما تشوف الا رؤوس رؤوس
متع الجيش والحراسات والقناص مصوب جيهتك ومستعد
والمنطقة اللي لونها اشهب هذه بارتا عكارة
اللي هما يسموا فيها توا (باب أكارة)
منطقة بارتا عكارة
فيها عمارات ومساكن شعبية
رايحة في حالة اعديكم وكلها مجاري وايامات سود
واهالي المنطقة قريب يقطعوا شلاتيتهم
من الوسخ والعفن حاشاكم
واللي محاديتها من الجهة الاخرى
زي ما كتبت عليهم عمارات بوسليم
حتى هما احرف واحرف
والمنطقة باللي فيها ما نحكيلكمش عليها
هذا من غير السجن الاغبر اللي فيها
وياااااااا لطيف وخلاص
أما اللي مكتوب عليها رقم (1)
هذه منطقة يطلق عليها زمان غابات النصر
(توا انظني غيروا اسمها )
مكتوب عليها حديقة الحيوان
لكن الحق ياربي
نصها للحيوانات اللي ربي خلقهم حيوانات
ونصها الأخر اللي ربي خلقهم بنادمية
وبفعل وانجازات القذافي راحوا حيوانات
منطقة متع أمن لا تقدر تقيم عينك وانت خاطم جنبها
ولا تقدر تنشد حد عليها
وكلها معبية بالحرس والجيش
وكتائب ما يسمى بالأمن
وانت خاطم جنبها وكأنك خاش في حرب
قريب تقطع النفس من الرعب
وطبعا أكيد حتى هي تابعة للقذافي
لأنها قريبة على سجن بوسليم من جهة
ومن جهة ثانية قريبة على القيادة
(باب العزيزية)
وين ما يسكن معمر
وهذه صورة قرررريبة لحوش القذافي
بالله عليكم وبدون مبالغة
شوفوا الفرق بين المنطقة اللي فيها حوش القذافي
والمناطق اللي يسكن فيهم الشعب الغلبان
ويبونا نسكتوا ونرضوا بالهم وما انقولوا شيء
لا حول ولا قوة إلا بالله العلي العظيم
*************
اسمعوا ياراهو
هذه مدينة طرابلس مدينتي
انجبت وتربيت فيها
لين ظفرت الشيب وانا فيها
ونعرفها زي ما نعرف نفسي وأكثر
ونحفظها شبر شبر
أكثر ما نحفظ اسمي
فـ لا يكذب عليكم حد ولا يبرولكم حد
*******************
وهي تصبحوا على خير الليلة
****************
ملاحظة:
سأستمر في توضيح المكان وبالتحديد ومن جميع الجهات
مع العلم يقال بأن للقذافي
لديه العديد من الأماكن لمبيته في طرابلس وغير طرابلس
ولكن ((القيادة - باب العزيزية)) هي مقره الرئيسي
ليست هناك تعليقات:
إرسال تعليق
lailaelhoni_68@yahoo.com, blaila89@hotmail.co.uk