كسكسي عسلوز بدون عسلوز .. صـــور

موضوع قديم (شوية) إلا إنه لا يسقط بالتقادم

 خاص لجماعة خارج ليبيا 

 وايضا الطريقة لصديقات واصدقاء الصفحة المتواجدين في مدن ليبية أخرى 

غير طرابلس وأخواتها 

( يعني منه أجر ومنه منفعة ) 

 لأن العسلوز لا يباع في أسواقنا زي ليبيا للأسف

 
كسكسي عسلوز بدون عسلوز

 

(هو كان غداي اليوم) 



زوجي بعيو ذات يوم جابلي من هذه الخضروات الصورة 1 .. (كدس مش شوية) 

من سوق اسمه

 

(TESCO)

 

(جماعة بريطانيا يعرفوه ودلالهم)

 

ففكرت فكرت شن يا ربي انديرله باش يأكلوه العيلة ويعجبهم. 

في الأخييييير خطر على بالي وقلت نمشي اندير بيه كسكسي عسلوز 

(سعدك بختك)
 

قرضته تقريض صغيرة زي تقريضت العسلوز


ونقعت الكسكسي الصورة 2 

وحطيته على النار يتبوخ زي (العادة) وكأنه كسكسي عسلوز بالزبط
 

وهي: بعد تقريض العسلوز يوضع في الكسكاس متع المقفول ويوضع فوق منه الكسكسي 
ويوضع على النار بشرط ما يتحركش ابدا، لين تلقى العسلوز قد نضج بالكامل... وبإمكانكم تحسبوه بالوقت 

( اللي يريحكم ) طبعاً


**********

 في نفس الوقت قطعت الجزر (السفناري) قطع صغيرة، وحطيته يغلي على النار لين نضج (طاب) بالتمام


.

 درت الدباير متع العسلوز وهم:

 زيت زيتون + فلفل أحمر مرحي+ ثومة+ كروية وكسبر+ ملح + ليم قارص معصور الصورة 3 



هذه الخلطة فيه عائلات تطبخ فيها فوق النار شوية، 
وفيه عائلات لا تطبخها واحنا من العائلات اللي ما تطبخش فيها 
(حسب زمان طبعا) .. 

المهم الدباير ينحطوا ويتخلطوا بااااااهي بلا طبخ
 لكن أنا في حوشي (انطيب فيه) أطبخه الحقيقة تبعا لعادات أهل زوجي  حفظهم الله.


وطريقة الإضافات للكسكسي صورة 4 


بعدها رحيت السفناري في الرحاية طبعا حكاية (الرحاية الكهربائية) جديدة.

لأنهم للأمانة زمان كانوا يسحنوا فيه بايديهم، والا بالشوكة (الفركيـطة) والا بالمهراس.

 على حسب الرغبة والجهد طبعاً الصورة 5

 

وبعدها السفناري ضفتله شوية من الدباير اللي خلطت بيهم الكسكسي وخلطتهم بالسفناري (الجزر) باااهي .. الصورة 6

 

وبعدين خلطة (السفناري) صبيت منها على الكسكسي وخلطتها بالكسكسي .. الصورة 7 


وبعدها خديت السفناري المهروس والجاهز اللي تبقى من الخلطة وزينت بيه الكسكسي زي الصور 8

 

وتمت قصتي مع كسكسي بالعسلوز من غير عسلوز

 ( زي العسسسسسل )

 

على  فكرة كسكسي العسلوز "مسكين" على قد ما فيه من جهد وتعب ومشقة لا توصف،
 لكن للأسف الشديد من الضروري انطيب معاه حاجة ثانية، واليوم طيبت معاه دجاج محمر هو (مش محمر) لكن حلو .. وهذا مرة ثانية انقوللكم على طريقته وهي أيضاً من تأليفي 

و (  اللي اطيبه العمشة ياكلوه صغارها)

 سر .. والصراحة السبب اللي يخلي فيا انطيب في حاجة ثانية معاه، وهو أن مش كل العيلة تأكل فيه، وبالاخص أحمد وعبد الاله ولداي (بسلامتهم) اما الثانيين اوكى ( ماشي حالهم) يأكلوا فيه ما فيش مشكلة عندهم، 

لكن مش زيي انا وبعيو قريب تصير جريمة لأجله.

وهي تفضلوا معانا



((حصتكم مدسوسة))

 
 ــــــــــــــــــــــ

 ليلى أحمد الهوني